تبلیغات
به زبانی دیگر
...:: بسم الله الرحمن الرحیم ::...
دوشنبه 29 بهمن 1386

سهندیه ( شعر از استاد شهریار )

دوشنبه 29 بهمن 1386

نوع مطلب :آذربایجان، 
نویسنده :altshift

سهندیه ( شعر از استاد شهریار )

.

شاه داغیم ،

 چال پاپاغیم ،

ائل دایاغیم ،

شانلی سهندیم

باشی طوفانلی سهندیم

باشدا حیدر بابا تک قارلا قیروولا قاریشیب سان

سون ایپک تئللی بولودلارلا افقده ساریشیب سان

.

برای دیدن متن کامل شعر زیبای سهندیه روی ادامه مطلب کلیک کنید ...

سهندیه ( شعر از استاد شهریار )

.

شاه داغیم ،

 چال پاپاغیم ،

ائل دایاغیم ،

شانلی سهندیم

باشی طوفانلی سهندیم

باشدا حیدر بابا تک قارلا قیروولا قاریشیب سان

سون ایپک تئللی بولودلارلا افقده ساریشیب سان

ساواشارکن باریشیب سان

 

گویدن الهام آلالی سرری سماواته دئیه رسن

هله آغ کورکی بورون ، یازدا یاشیل دون دا گئیه رسن

قورادان حالوا یئیه رسن

 

دوشلرونده صونالار سینه سی تک شوخ ممه لرده

نه شیرین چشمه لرین وار

اویاشیل تئللری ، یئل هورمه ده آینالی سحرده

عشوه لی ائشمه لرین وار

قوی یاغیش یاغسادا یا غسین

سئل اولوب آخسادا آخسین

یانلاروندا دره لر وار

قوی قلمقاشلارین اوچسون فره لرله ، هامی باخسین

دوشلرونده هئره لروار

او اتک لرده نه قیزلار یاناغی لاله لرین وار

 

گول چیچکدن بزه ننده ، نه گلین لرکیمی نازین

یئل اسنده اوسولاردا نه درین راز نیازین

اوینایار گوللوقوتازین

تیتره ییر ساز تئلی تک شاخه لرین چایدا چمنده

یئل او تئلرده گزه نده ، نه کوراوغلی چالی سازین

اورده گون خلوت ائدیب گولده پری لرله چیمنده

قول قانادان اونا آغ حوله آچار غمزه لی قازین

قیش گئده ر ، قوی گله یازین

هله نوروز گلی وار ، قار چیچگین وار ، گله جکلر

سئل ، یاغیشدا یویونار کن ده گونش له گوله جکلر

اوزلرین تئز سیله جکلر

 

قیشدا کهلیک هوسی له ، چوله قاچدیقدا جوانلار

قاردا قاققیلدا یاراق نازلی قلمقاشلارین اولسون

یاز ، او دوشلرده ناهار منده سین آچدیقدا چوبانلار

بوللی ، سودلی سورولر ، دادلی قاووتماشلارین اولسون

 

آد آلیب سندن او شاعر کی ، سن اوندان آدآلارسان

اونا هر داد وئره سن یوز او مقابل داد آلارسان

تاریدان هر زاد آلارسان

آداش اولدوقدا ، سن اونلا ، داها آرتیق اوجالارسان

باش اوجالدیقدا دماوند داغیندان باج آلارسان

شئر الیندن تاج آلارسان

اودا ، شعرین ، ادبین شاه داغیدیر ، شانلی سهندی

اودا ، سیمرغ دن آلماقدادی فندی

شعر یازاندا قلمیندن باخاسان در سپه لندی

سانکی اولدوزلار الندی

سوز دئینده گوروسن قاتدی گولی ، پسته نی ، قندی

یاشاسین شاعر افندی

اونه شاعر ، کی داغین وصفینه مصداق اونی گوردوم

من سنون تک اوجالیق مشقینه مشاق اونی گوردوم

عشقه ، عشق اهلینه مشتاق اونی گوردوم

اونه شاعر ، کی خیال مرکبینه شووشیغایاندا

او نهنگ آت آیاغین توزلی بولودلاردا قویاندا

 

لوله لنمکده دی یئر - گوی نئجه طومار ساریاندا

گوره جکسن او زماندا

نه زمان وارسا ، مکان وارسا کسیب بیچدی بیر آندا

گئچه جکلر ، گله جکلر نه بویاندا ، نه اویاندا

نه بیلیم قالدی هایاندا؟

 

باخ نه حرمت وار اونون ئوزدئمیشی توک پاپاغیندا

شعرینین تاجی اگیلمیش باشی دورموش قاباغیندا

باشینا ساوریلان اینجی ، چاریق اولموش آیاغیندا

وحی دیر شعری ، ملک لردی پیچیلدیر قولاغیندا

شهدی وار بال دوداغیندا

 

اودا داغلار کیمی شانینده نه یازسام یاراشاندیر

اودا ظالم قوپاران قارلا کولک له دوروشاندیر

قودوزا ، ظالمه قارشی سینه گرمیش ، ووروشاندیر

قودوزون کورکنه ، ظالم بیره لر تک داراشاندیر

آمما وجهینده فقیر خلقی اگیلمیش سوروشاندیر

قارا ملتده  هنر بولسا هنر له آراشاندیر

قارالارلا قاریشاندیر

ساریشاندیر

گئجه حققین گوزودیر ، طور تورتمیش اوجاغیندا

اری ییب یاغ تک اورکلردی یانیرلار چیراغیندا

می ، محبتدن ایچیب لاله بیتیبدیر یاناغیندا

او بیر اوغلان کی ، پری لر سو ایچرلر چاناغیندا

اینجی قاینار بولاغیندا

طبعی بیر سوگلی بولبول کی ، اوخور گول بوداغیندا

ساری سونبول قوجاغیندا

سولار افسانه دی سویله ر اونون افسونلی باغیندا

سحرین چنلی چاغیندا

 

شاعرین ذوقی ، نه افسونلی ، نه افسانه لی باغلار

آی نه باغلارکی ((الف لیلی )) ده افسانه ده باغلار

اودیاخیب ، داغلاری داغلار

گول گولرسه بولاغ آغلار

 

شاعرین عالمی ئولمز ، اونا عالمده زوال یوخ

آرزیلار اوردا خاطرلیه امکاندی ، محال یوخ

باغ جنت کیمی اوردا بو حرام دیر بوحلال یوخ

اومحبتده ملال یوخ

اوردا حال دیر داها قال یوخ

گئجه لر اوردا گوموشدندی ، قیزیلدان نه گونوزلر

نه زمرد کیمی باغلاردی ، نه مرمر کیمی دوزلر

نه ساری تئللی اینکلر ، نه آلا گوزلو ئوکوزلر

آی نئجه آی کیمی اوزلر؟

 

گول آغاجلاری نه طاوس کیمی چترین آچیب الوان

حلله کروانیدی چوللر ، بزه نر سورسه بو کروان

دوه کروانی دا داغلار ، یوکی اطلس دی بو حیوان

صابرین شهرینه دوغرو ، قاطاری چکمه ده سروان

او خیالیمداکی شیروان

 

اور دا قاردا یاغار ، آمما داها گوللر سولا بیلمز

بو طبیعت ،او طراوتده محال دیر اولا بیلمز

عومر پیمانه سی اوردا دولا بیلمز

 

او افقلرده باخارسان  نه ده نیزلر ، نه بوغازلار

نه پریلر کیمی قوشلار قونوب ، اوچماقدا ن قاز لار

گولده چیممکده نه قیزلار

 

بالیغ اولدوز کیمی گوللرده ، ده نیز لرده پاریلدار

آبشار مرواری  سین سئل کیمی توکدوکده خاریلدار

یئل کوشولدار ، سو شاریلدار

.